തുളസിയില കൈകൊണ്ടു ഞെരടിയാല്‍, ഒരുതരം ഗന്ധം പുറത്തുവരുന്നത് ശ്രദ്ധിച്ചിട്ടുണ്ടാവും. 'യൂജിനോള്‍' എന്ന ജൈവസംയുക്തത്തിന്റെ സാന്നിധ്യമാണ് ഇതിന് ഇടയാക്കുന്നത്. അതിവിശിഷ്ടമായ ഔഷധമാണ് 'യൂജിനോള്‍' എന്നാണ് ശാസ്ത്രജ്ഞര്‍ ഇപ്പോള്‍ കണ്ടെത്തിയിരിക്കുന്നത്. ഉദാഹരണമായി വന്‍കുടലിനെ ബാധിക്കുന്ന അര്‍ബുദത്തെ സുഖപ്പെടുത്താന്‍ തുളസിനീരിലുള്ള 'യൂജിനോളി'നു കഴിയുമത്രെ. അതുപോലെ സ്തനാര്‍ബുദ ത്തെ ഭേദമാക്കാനും.
തുളസിച്ചെടിയില്‍നിന്ന് ഇപ്പോള്‍ കിട്ടുന്നതിനെക്കാള്‍ കൂടിയ അളവില്‍ 'യൂജിനോളി'നെ പുറത്തെടുക്കുകയാണ് ഗവേഷകരുടെ ലക്ഷ്യം. ഇതുമായി ബന്ധപ്പെട്ട ഗവേഷണമാണ് കെന്‍ടക്കി സര്‍വകലാശാലയില്‍ ഇപ്പോള്‍ നടക്കുന്നത്. തുളസിച്ചെടിയില്‍ 'യൂജിനോള്‍' ഉല്‍പ്പാദിപ്പിക്കാന്‍ സഹായിക്കുന്ന ജീനിനെ കണ്ടെത്തുകയും അതിന്റെ പ്രവര്‍ത്തനമികവ് കൂട്ടിയെടുക്കുകയുമാണ് ഗവേഷണപദ്ധതിയുടെ ലക്ഷ്യം. ഇപ്പോള്‍ പ്രാഥമിക ദശയിലാണെങ്കിലും ഗവേഷണം വിജയിച്ചാല്‍, ജനിതക പരിവര്‍ത്തനം വരുത്തിയ തുളസിയാകും സൃഷ്ടിക്കപ്പെടുക. അതായത് "ജനിതക തുളസി".
ഇതിന്റെ അടിസ്ഥാനത്തില്‍, കെന്‍ടക്കി സര്‍വകലാശാലയിലെ ഗവേഷകര്‍ക്ക്, അവര്‍ സൃഷ്ടിക്കുന്ന "ജനിതക തുളസി"യെ പേറ്റന്റ് ചെയ്യാം. ബൗധിക സ്വത്തവകാശനിയമത്തിന്റെ പേരില്‍ ഇത് ചോദ്യംചെയ്യുക സാധ്യമല്ല. തുളസിച്ചെടി ഏഷ്യയുടെ വിവിധ ഭാഗങ്ങളില്‍ വളരുന്നുണ്ട്. എങ്കിലും, തുളസിയുടെ ജന്മദേശം ഇന്ത്യയാണെന്നാണ് കരുതപ്പെടുന്നത്. എന്നാല്‍, ഇതിന്റെ അടിസ്ഥാനത്തില്‍ തുളസിച്ചെടി നമ്മുടേതാണെന്നു വാദിക്കാന്‍ നമുക്കാവില്ല.
രാജ്യാന്തരവേദികളില്‍ ഇന്ത്യ ഇക്കാര്യം പലപ്രാവശ്യം ഉന്നയിച്ചിട്ടുണ്ട്, അവകാശമുണ്ടാവണം എന്നാവശ്യപ്പെട്ടുകൊണ്ട്. എന്നാല്‍, ഈ അവകാശവാദങ്ങളൊക്കെയും പരാജയപ്പെടുകയായിരുന്നു. "ജനിതക തുളസി" സൃഷ്ടിക്കുമ്പോള്‍, ഇത്തരം ചര്‍ച്ചകള്‍ കൂടുതല്‍ സജീവമാകുമെന്നാണ് പ്രതീക്ഷ.
Source: http://www.wku.edu
Print Edition of this story was published in 'Kilivathil', the Science Supplement of Deshabhimani Daily dated 2nd February 2014.
